太古夥馬莎「全麵關心你」邊消費邊做善事

行政人員版 04:00 2021/10/08

分享:

疫情期間好多人都變咗廚神,黛安聽公關姊妹講,太古地產同太古基金合辦嘅「全麵關心你x M&S」配對捐助計劃暖心回歸,大家可以一邊消費一邊做善事,可謂一舉兩得。

太古今年夥拍英國馬莎,精心搭配咗4款優質食材,包括意粉雜菜湯、橄欖油浸沙甸魚、意大利粉和扁意粉,仲特意設計咗2款創意食譜,就算係煮食新手,都可以輕鬆煮出英式美食。

姊妹話,即日起至10月17日,只要以慈善價$50買一盒「全麵關心你x M&S」,太古基金嘅「信望未來」計劃就會配對捐贈畀「路向四肢傷殘人士協會」,同埋「聖雅各福群會眾膳坊食物銀行」,希望推廣「惜食就要一齊食」嘅共享精神。參加方法好簡單,只要填妥網上訂購表格,再用電子支付,包括PayMe或轉數快付款,之後去太古城中心取貨就得喇!

下星期五(15日)至17日,太古城中心仲會設置期間限定嘅「全麵關心你」義賣專櫃,同時招募公司嘅義工團隊「太古地產愛心大使」,一齊支援義賣專櫃運作。想知道更多詳情,可留意活動嘅fb和ig專頁。

本文轉載自《晴報

10月15日至17日,太古城中心會設置期間限定「全麵關心你」義賣專櫃。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版