7仔淡雪士多啤梨甜品 $13嘗日本直送美味

行政人員版 04:00 2021/11/30

分享:

踏入士多啤梨當造期,日本稀有品種「淡雪士多啤梨」係唔少草苺粉絲嘅至愛。公關姊妹同黛安講,7-Eleven嘅7-SELECT今期帶嚟3款日本直送嘅「淡雪士多啤梨系列」甜品,將用呢款士多啤梨製造嘅忌廉加入泡芙、瑞士卷同蛋糕當中,即日起以$13就可以試到新鮮甜蜜嘅滋味。

呢3款甜品可謂各有特色,其中「淡雪士多啤梨忌廉瑞士卷」用咗日本烘培技術製成,質感鬆軟,又有士多啤梨濃郁香氣,加埋忌廉嘅香滑口感,甜而不膩;「淡雪士多啤梨雙層忌廉泡芙」嘅泡芙軟熟之餘帶蛋香,當中包住一層士多啤梨味忌廉,再加埋另一層香滑日本牛乳忌廉,一次過可以得到雙重滿足;「淡雪士多啤梨鮮忌廉蛋糕」餅底鬆軟,再配上士多啤梨味忌廉同果醬,味道香濃又有層次,令人愛不釋手。

7-Eleven亦順勢推出2款三文治「芫荽濃厚滑蛋火腿三文治」同「三重芝士火腿三文治」,前者選用濃郁芫荽醬同日本濃厚滑蛋混合,帶嚟多重口感享受;後者使用綿滑香甜嘅純正澳洲忌廉芝士,「芝」味無窮,黛安真係急不及待要去試下。

本文轉載自《晴報

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版