唔跳唔知身體好

副刊版 2022/06/14

分享:

分享:

這個標題,調轉講亦可以:跳幾跳先知自己體能下降了。

話說疫情期間,一切運動體能跳舞班都停擺,差不多整整兩年,我都只是靠在家運動。我算是個肯郁動的人,但長時間靠自己運動,有以下問題:做做下攰攰哋,會同自己講:「無問題,抖一陣、飲啖茶先。」咦,今日好似不在狀態喎……「何須咁操勞呢?今日只做些拉筋動作吧!」就這樣,我抱持「三不」:不難為、不勉強、不苛待自己的態度做運動,還以為體能keep到似昔日。

四月底,健身室重開,運動細胞蠢蠢欲動,於是,重出江湖、係威係勢,劈頭連續報兩堂,結果:先是氣喘吁吁地跳了一堂極高帶氧運動的健體舞,然後再來一課瑜伽班,回到家渾身痛到嗌救命,為食先生邊替我按摩邊說:「何苦搏老命?」「想當年,老娘連跳兩堂舞幾近三小時,氣不喘、眼不眨,水都唔使飲多啖……哎呀,輕力點……」「你都識講啦!想當年呀!」

眾友談及體能,七嘴八舌:「行多幾層都喘喘哋。」「前日耍少林八段錦,對腳依家仲痛。」「以前蒲到凌晨,第二朝照去打拳操肌,依家遲少少瞓都唔得呀!」中年人的體能,已不像年輕般「大把貨」,必須在意去keep,隨着年紀增長,人體退化會令肌肉量慢慢減少,成年人在四十歲後,肌肉質量平均每十年會減少百分之八,大腿肌肉力量也會每十年下降一成至一成半,嚴重者會患上肌少症,容易跌倒;另外,人體的呼吸也需要肌肉,若有肌少症,連呼吸也會變虛弱,而肌少症最主要原因是不運動。

我的體會是:「唔跳唔知身體無咁好」,所以現在不敢怠慢,大字跳、深蹲和平板支撑每天都不能缺少(單靠走路並不足以強化肌肉),因為一定要鍛練肌肉和強化心肺功能,體能才能夠保持。而身體也是十分奇妙的,適應力和治癒力比我們想像中強,經過一輪在家操練後,現在終於可以笑着上我的跳舞班了!

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版