喪C出動

副刊版 2022/08/25

分享:

分享:

搲着數夾集了貪心、自私同厚面皮之極致。中秋臨近,不少公司有送月餅給客戶/潛在客戶的習慣,是一年一度與客戶保持連繫的小心意。作為客戶的,要明白人家送禮是一回事,去到自己主動開口問人攞月餅,那就是搲。這是友人公司的故事。

每年將近中秋,友人公司必收到一個名存實亡的「客戶」(幾年前的一單小生意,故送過一年月餅給她)的來電搲月餅:「無,想睇下你哋今年會唔會送月餅嚟,你知啦,咁多公司送嚟,我驚食唔晒,咪問定邊間送,等我哋有個預算吖嘛!」別人免費送禮,收禮者要「預算」啲乜呢?雖然是無法理解的邏輯,但既然開口問到,豪一盒俾佢又點話。如是者過了幾年,這「客戶」亦無再俾過生意友人公司,我姑且稱她為喪搲C(Client)。

喪C今年又出動,更變本加厲:「今年你哋送唔送月餅嚟?其實我想同你哋講,往年嗰間×××麻麻地好食,我都係鍾意××樓(五星級酒店)嗰隻奶黃月餅,得嘅話,我想要兩盒。」彈完人家的禮品後,還不斷要搲,而且還要一副奉旨的態度。我邊聽友人敘述,邊想起蔡瀾寫的《蔡瀾眼中的八婆與美女》,他對兩者有精闢的觀察和見解。聽着友人形容那位喪C的嘴臉和口脗,我彷彿看見書中的一些文字有了一個活人模樣跳了出來,不禁嘻嘻笑出聲來。

問友人如何處理?他說:「呢幾年都無做過佢半單生意,但月餅年年照送過去,搲着數搲到咁難睇,日後公司同佢做生意都唔會有運行,放棄毫不可惜,於是同佢講:『唔好意思,××樓嘅月餅我哋係有預備送俾VIP客戶嘅,但係好似你唔喺我哋個VIP名單添,真係唔好意思。原來之前嗰隻月餅送得你咁唔滿意,唔緊要,我哋知點做㗎喇。』隨即收綫可也。」

點做?對付搲之不盡的喪C,斷其搲着數之路,即令她揼心𦧲地、苦不堪言。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版