沒有無緣無故的輸

副刊版 2022/09/26

分享:

分享:

客戶有幾重要?廣告人和公關人一定知,超級重要!某廣告公司曾痛失一個大客,整個原為服務該客戶而設立的部門,足足三十多人,一日內全部炒晒。因此,職場智慧:先不要講要如何下決心或有信心去搶新客戶,首要工作是,在你手上要留得住現有客戶,這也應是主管的KPI(Key Performance Indicator,關鍵績效指標)。

若連舊客都留不住,還日日夜夜不停地講搶新客,真是你唔尷尬,人家也替你面紅。最肉酸者,莫過於連合作多年的舊客們,去到你這個新主管手上,都不約而同講拜拜,呢條數,你點孭?所謂的「數」,不僅是公司當下的金錢損失,若所轉的新公司湊得個客妥妥貼貼、開開心心,咁就真係一去無回頭的長遠損失,仲未計客戶被搶令公司面目無光的形象和聲譽損失。

現世代無秘密。邊間公司無咗邊個大客?個客去咗邊?乃眾目睽睽之事。因此,頂頭老細一聽到公司失去舊客戶,必定嬲到震。若此時阿主管還怪個客好走咗去、唔俾多次機會自己,又或解釋:「我都唔知個舊客點解會走喎?﹗我哋都係用舊有方法一直咁湊個客㗎啦,上年仲好哋哋,我哋都好費解喎?﹗」做主管的,竟然還問得出這些問題,那就是失去大客最關鍵的問題所在。

喂喂喂,最基本係咪要做吓 Competitor Review(競爭對手分析和報告)呀?湊得大客,打滾職場,唔係唔識做/唔知要做啩?觀察下競爭對手做過甚麼吸引(新)客戶的舉動?正在做甚麼?未來又有甚麼新動向去吸引更多新客戶?只要做個Competitor Review,知道外邊對家做了甚麼吸引之事,就不會傻下傻下自己衰喺邊都唔知,而且繼續衰落去。

醒目的客戶總監都深知,未搶到新客之前,最最最緊要的,是先勿讓人從自己手上搶走現有的舊客。醒目與唔醒目有天淵之別,天下間沒有無緣無故的輸。

撰文 : 利嘉敏

欄名 : 攻關女子

緊貼財經時事新聞分析,讚好hket Facebook 專版