經典故事化身打卡熱點 太古城中心11米聖誕樹矚目

行政人員版 04:00 2022/11/15

分享:

分享:

今年聖誕節有好多節目等你住!黛安收到風,太古城中心下星期五(25日)起至明年1月2日,會以經典聖誕故事做主題,喺場內設置3個打卡熱點,仲有11米高聖誕樹,讓各位Story Traveller體驗充滿想像和驚喜嘅玩味聖誕。

本地插畫家親繪隧道背景

黛安聽公關姊妹講,今次沉浸式故事世界特別邀請咗8位本地插畫家合力聯創,令童話中嘅美好和歡樂一一成真。焦點之一必定係11米高嘅聖誕樹,以書頁做設計概念,呈現夢幻漸變色,樹頂仲有故事書做裝飾點綴。樹入面環繞住本地插畫家創作嘅童話森林,糅合大型立體花朵,好似走入繪本一樣,製作非常有諗頭。

另外,場內有3個加入光影元素嘅打卡區,分別係《雪人》、《胡桃夾子》和《北極快車》。黛安就最想去《北極快車》和《胡桃夾子》,因為姊妹話,大家可以坐喺極地冰屋拱頂下,抬頭就可以望北極光,仿如置身冰島,另一邊亦有超過270個唔同色彩嘅胡桃夾子,絕對值得到此一遊。

姊妹仲話,商場特別請咗一班本地插畫家親繪隧道背景,每兩星期就會加入新一位插畫家作品。大家只要掃描場內活動二維碼登記,就可以製作個人專屬嘅聖誕彩飾,帶返屋企做紀念。

本文轉載自《晴報

11米高巨型聖誕樹

立正!胡桃夾子

幻彩泡泡雪人

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版