中環街市「相約慶春約」展覽 認識新界7大客家村文化

行政人員版 04:00 2022/12/01

分享:

分享:

如果大家想認識本港鄉郊傳統文化,而家有機會喇,黛安知道,中環街市一樓傳承館即日起至明年2月28日,會舉行為期3個月嘅「相約慶春約」展覽,以「時空平行慶春約城鄉共融在中環」為主題,向公眾展示新界東北7大客家村慶春約嘅傳統文化。

展覽由華懋集團主辦、香港建築中心策展,並得到慶春約7村村長等多個合作夥伴支持籌辦。活動會透過「光、聲、觸」感觀體驗,展示村民4種生活本質「衣、食、住、行」,令參觀者好似置身慶春約7村,藉以保存及推廣當地文化同經濟發展。

展覽以客家傳統涼帽為特點,天花板掛咗唔同高度嘅涼帽,等遊人可以假裝戴上涼帽打卡。同時會透過科技投影出7個客家村嘅日與夜照片,現場亦會播放客家歌曲,畀大家感受下呢個客家鄉村嘅生活。此外,遊人仲可以睇到慶春約客家人喺荔枝窩種植嘅咖啡豆、薑黃、稻米、薑、無基因改造木瓜等地道產品,認識新界東北7大客家村嘅傳統文化。香港建築中心主席葉頌文話,冀透過展覽吸引市民親身去到荔枝窩,了解慶春約客家村。

本文轉載自《晴報

華懋集團執行董事蔡宏興(右三)、漁護署署理署長黎堅明(右四)、香港建築中心主席葉頌文(右二)、慶春約7村村長代表主持儀式。

撰文 : 黛安 消息特靈八卦公關

欄名 : 八卦名利場

緊貼財經時事新聞分析,讚好hket Facebook 專版