東薈城名店倉「FUNtastic World」 9大打卡點 ＋ 聖誕市集 ＋ 戶外音樂會

珍寶珠味道百變，相信好多人都食過，黛安知道，東薈城名店倉將同珍寶珠合辦「FUNtastic World」，設置9座童趣滿「FUN」嘅主題裝置，配合場內聚集40個特色攤檔嘅聖誕市集，為大家帶嚟一個甜蜜聖誕。

其中6座互動裝置設喺商場內，包括5米高嘅珍寶繽FUN熱氣球、超巨型珍寶珠等，戶外則有滙集逾600盞小燈泡嘅炫彩星光隧道、屹立平台廣場中心嘅珍寶聖誕樹等，最適合約埋好友去打卡。

此外，本月9日起指定周末喺4樓平台廣場仲會舉辦聖誕市集，有逾百款聖誕主題精品、手工、咖啡烘焙等商品；另外，會喺指定周末及公眾假期舉行戶外音樂會，由15組本地年輕Busker和樂隊輪流登場，香港管弦樂團更會喺18日到場演奏經典聖誕樂章，大家千祈唔好錯過呀！

本文轉載自《晴報》